السرطان ... سؤال وجواب

 السرطان ... سؤال وجواب

الغذاء

هل الأكل يسبب السرطان ؟ هل لمريض السرطان أكل مخصوص ؟

هل الأكل يساعد على الشفاء أو رجوع المرض؟

معلش البوست طويل لأن ده اكتر سؤال بيسأله كل الناس

** الملخص للي مش عاوز يقرأ الرغي اللي جاي ... الأكل عمره ما كان السبب الأول

أو الرئيسي للإصابة بالسرطان او نمو السرطان أو ارتجاعه بعد الشفاء ...

وكمان مفيش اكل بيعالج السرطان او بديل عن العلاج

** يعني مفيش علاقة بين الغذاء والسرطان؟؟ لأ في علاقة ...

لكن مش بدرجة الأهمية التي يتخيلها البعض

أولا ... لكل الناس ... اللي خايف وعاوز الوقاية ...

بنقول إن التوصيات الغذائية للوقاية من السرطان جزء من التوصيات العامة التي تهدف الى تجنب الأمراض

والمحافظة على الصحةمثلا ... الجمعية الاميركية للسرطان فى عام 2012 قد وضعت عدة مبادئ عامة ...

* النشاط البدني: هو الوسيلة الرئيسية لتحديد الوزن كما تقلل خطر الاصابة بالسرطان ...

خاصة سرطان القولون ... ويقصد بالنشاط البدني تمارين معتدلة

او شاقة لمدة 30 دقيقة على الأقل معظم ايام الأسبوع

* تجنب زيادة الوزن ... وزيادة الوزن في سن البلوغ

* الحد من المشروبات الكحولية (والحمد لله دي مش مشكلة كبيرة عندنا)

* تناول الفواكه والخضروات بكثرة

* تناول الشعير (مش عارف الصراحة ازاي) وتجنب السكريات الكربوهيدرات المكررة

* استبدال اللحوم الحمراء ومنتجات الالبان ... بالأسماك والمكسرات والبقوليات

* فيتامين (د) ... نسبة كبيرة من الناس عندها نقص فيتامين (د)

وفي ارتباط وثيق بين نقص هذا الفيتامين والإصابة بالسرطان علشان كده بينصحوا

الناس بره تأخذ مكملات غذائية فيها فيتامين د في شهور السنة اللي مفيهاش شمس قوية ... طبعا عندنا الشمس زي الفل

زي ما انتم شايفين كلها نصائح عامة ... مفيهاش بقى الهري اللي موجود على النت والفيس ...

لكن منظمة الصحة العالمية في 2015 أكدت أن زيادة تناول اللحوم المصنعة (50 جم يوميا)

بتزود فرص أو تعتبر أحد مسببات الإصابة بسرطان القولون والمستقيم

ثانيا ... طيب لو لا قدر الله واحد مصاب بالسرطان ياكل ايه؟؟

في الأغلب بالنسبة للأصحاء بتكون المشكلة في سوء التغذية نتيجتها السمنة

علشان كده في الأغلب بتكون النصيحة الطبية لهم زي ما قلنا هي تناول الكثير من الخضروات والفواكه.

الحد من كمية اللحوم الحمراء، خاصة اللحوم التي يتم معالجتها

أو التي تحتوي على نسبة عالية من الدهون؛ تقليل الدهون والسكر والملح؛ والبقاء في وزن صحي.

لكن مريض السرطان القصة عنده مختلفة شوية ... لأن المرض وعلاجاته ممكن يغير طريقة تناولك للأكل.

وممكن كمان يؤثر على الطريقة التي يتقبل بها جسمك الأكل

إحنا محتاجين أثناء علاج السرطان إلى تغيير نظامك الغذائي للمساعدة في بناء جسمك وتحمل آثار السرطان وعلاجه.

يعني ممكن نقولك تأكل الأشياء التي لا ينصح بها عادة عندما تكون بصحة جيدة.

على سبيل المثال، ممكن نطلب منك تزود الدهون والسعرات الحرارية للحفاظ على وزنك،

أو نقولك تاخد الآيس كريم أو الحليب المخفوق علشان القرح في فمك وحلقك تجعل من الصعب تناول أي شيء وهكذا ...

على حسب نوع السرطان ومكانه في الجسم والعلاج وآثاره الجانبية.

يعني الكلام اللي على الأنترنت وقصص منع السكريات ومنع المواد الحافظة ومنع اللحوم

ومنع ....... كله كلام فارغ ... مش بس مش مفيد ده ممكن يكون خطير ومضر للغاية ...

من أسوأ الأشياء اللي بنقابلها في عيادتنا هو ان المريض يحصله هزال (نقص شديد في الوزن)

وساعات كتير بيكون من أسبابه النصائح المهببة اللي بتعمل سوء تغذية وطبعا اشهرها منع السكريات

ثالثا ... طيب كثير من الناس بتسأل هل في أكل معين بيحارب السرطان وبيقضي عليه ؟؟

مفيش ... للأسف .. لا توجد دراسات تثبت ان اكل معين او فيتامينات أو المكملات الغذائية

أو الاعشاب, او الحاجات دي مع بعض يمكن ان تبطئ السرطان او تساعد على علاجه,

او منعه من العودة ... والمشكلة ان بعض هذه المنتجات يمكن ان يسبب مشاكل عن طريق

انها تتعارض مع بعض أدوية السرطان ده بالاضافة ان تصنيع الاشعاب

وتخزينها ممكن يكون في حد ذاته مصدر عدوى لمريض السرطان اللي اصلا مناعته ضعيفة ...

يعني الخلاصة الحاجات دي زي (القشطة) وسم النحل ومش عارف ايه تاني قلتها أحسن بالنسبة لنا ...

لا نستطيع ان نوصي بها