مستقبلات الهرمونات والعلاج الهرموني :يعني ايه تحليل مستقبلات الهرمونات ؟
ده تحليل بيتعمل في العينة اللي اتاخدت بابرة من الثدي بابرة او بعد استئصال الورم
عشان نشوف اذا كان خلايا الورم ده عليها مستقبلات هرمونات ولالا
طيب يعني ايه مستقبلات هرمونات؟
المستقبل ده بيبقي عبارة عن بروتين موجود علي سطح الخلية بيمسك في هرمونات الانوثة اللي في الدم.
والمستقبلات دي مش موجودة في كل الاورام ولو موجودة ده بيخلي الورم يكبر اول ما يشوف الهرمونات
طيب فيه كام نوع لمستقبلات الهرمونات ؟
فيه نوعين لان فيه نوعين من هرمونات الانوثة في جسم اي ست
طيب ايه اهمية اننا نعرف اذا كان الورم موجب ولا سالب للمستقبلات ؟
ان لو الورم موجب. يبقي نقدر نعالجه باننا نقفل المستقبلات دي
او نقلل كمية الهرمونات في الجسم عن طريق العلاج الهرموني
طيب يعني ايه علاج هرموني؟
ده بيكون اقراص او حقن وبتتاخد لمدة حوالي ٥ سنوات.
طريقة عمله باختصار انه بيعمل حاجة من اتنين. يا اما بيقفل مستقبلات الهرمونات.
يا اما بيقلل الهرمونات في الجسم. وفي الحالتين بيأثر علي نمو الورم الموجب لمستقبلات الهرمونات
طيب مين المريضة اللي تاخد علاج هرموني ؟
اللي عندها ورم موجب تاخد واللي عندها الورم سالب متاخدش طبعا
طيب العلاج الهرموني ده بيأثر علي الورم اوي يعني ؟
ليه تأثير قوي جدا في علاج الاورام الموجبة. ونتايجه هايلة
طيب مين احسن الورم الموجب ولا السالب لمستقبلات الهرمونات ؟
الموجب احسن لانه بياخد علاج هرموني وده ليه تأثير كبير زي ما قلنا
الأحد، 22 نوفمبر 2020
مستقبلات الهرمونات والعلاج الهرموني
الاشتراك في:
تعليقات الرسالة (Atom)
ليست هناك تعليقات:
إرسال تعليق