السرطان ... سؤال وجواب

 

السرطان ... سؤال وجواب

الكشف المبكر

قصة الاكتشاف المبكر واللي الدولة مهتمة بها اليومين دول في سرطان الثدي ...

واللي برضه للأسف البعض في القطاع الخاص بيعملها سبوبة مستغلا نقص المعلومات عندنا

اي حد عنده سرطان كل أقاربه ومعارفه وجيرانه بيبقى عندهم هاجس – وده طبيعي –

من الإصابة بالسرطان ... طيب نعمل ايه ؟؟ كتير جدا نلاقي انسان طبيعي عاوز يعمل فحوصات

وآشعات ومسح ذري وعينات ويضع نفسه تحت ضغط نفسي ومادي يضر أكثر مما يفيد

أولا ... مفيش حاجة اسمها اشعة على الجسم كله للكشف المبكر وتعالى اعملك تحاليل

علشان نتأكد خلو جسمك من السرطان ... كل ده نصب

ثانيا ... الدول والجهات البحثية والمنظمات او الهيئات واللي المفروض بتتبع العلم

والأبحاث في قصة الكشف المبكر لازم تحدد مين المستهدف من الكشف المبكر وفي أي مرض

طيب ايه المفروض نعرفه عن الكشف المبكر؟؟؟

احنا هنقسم الناس لنوعين ... الناس اللي عندهم او أقارب درجة أولى تاريخ مرضي للسرطان

دول لهم كلام مخصوص مش في البوست ده على حسب نوع المرض اللي عندهم في العائلة ...

والنوع التاني اللي هو اغلبية الناس واللي البوست ده ممكن يفيدهم

** ايه بقى الأمراض اللي نتائج الكشف المبكر وفوائده مؤكده للنوع التاني اللي معندوش تاريخ مرضي او عوامل خطورة كبيرة:

* سرطان الثدي ... السيدات ما بعد سن 45 سنة مطلوب منهم أشعة ماموجرام (مش سونار)

على الثدي سنويا ثم كل سنتين من سن 55 سنة ... فقط لا غير ... طب الكشف الذاتي للثدي ؟؟

ملوش لازمة حسب اخر التوصيات

* سرطان عنق الرحم ... ده له كشف مبكر - وكمان تطعيم له كلام مفصل في بوست منفصل بإذن الله -

مسحة PAP smear من سن 21 سنة ولغاية 65 سنة ... تتعمل كل 3 سنوات

* سرطان القولون ... للناس اللي بالصدفة اكتشفت ان عندها زوائد بالقولون

وعاوزة تطمئن مش مطلوب منهم غير منظار كل 10 سنين ... او نوع معين من الأشعة المقطعية كل 5 سنوات ...

في بعض تحاليل تانية ممكن تتضاف حسب الحالة

* سرطان الرئة ... لو حضرتك لسه مدخن (أو بطلت تدخين من فترة أقل من 15 سنة)

وبتشرب علبة سجاير يوميا لمده 30 سنة او اكتر وسنك فوق 55 سنة بتعمل مرة كل سنة آشعة مقطعية Low-dose helical chest CT على الصدر

* سرطان البروستاتا ... بعض المرضى فوق 50 سنة ... ممكن يعملوا تحليل PSA على الرغم من عدم ثبوت فائدة ذلك

عشان كده لازم نشرح لهم فوائد التحليل واضراره وهو يختار يعمله ولا بلاش

غير الحاجات دي مفيش كشف مبكر له فايدة ... وحتى أنواع السرطان دي لازم بالشروط اللي قلنا عليها باختصار

(قد يراه البعض مخل) لكن ... الخلاصة ... لو انت خايف على نفسك او عائلتك أو عندك – لا قدر الله – قريب من أقارب الدرجة الاولى عنده سرطان ... بلاش تسرع وصرف فلوس على فحوصات وآشعات وتحاليل دم ووسوسة على الفاضي ... أسأل طبيب ثقة

ملاحظتين في الآخر

** التوصيات دي مش بتاعتي ... دي توصيات الجمعية الأمريكية لعلاج السرطان ودي من اكبر –

إن لم تكن أكبر – مصادر المعلومات لكل الأطباء في كل العالم

** مرة تانية... الكلام ده للناس اللي معندهاش تاريخ مرضي لأقارب الدرجة الأولى

تحديث

*** هل لو عندي أقارب من الدرجة الأولى مصابين بالسرطان يبقى لازم يجي لي السرطان؟؟

في بعض الأحيان يكون السرطان في اكثر من فرد بالعائلة مش عشان الوراثة لكن عشان العادات السيئة المشتركة

واهمها التدخين والسمنة ... ودي حاجات ممكن نتجنبها ونقلل بالتالي حدوث السرطان ...

وفي ساعات تانية بتكون الجينات الوراثية من أسباب السرطان وبتنتقل من جيل لجيل ...

لكن مش بالضرورة الجينات دي تسبب السرطان

*** طيب اللي عنده في عائلته تاريخ مرضي قوي للسرطان يعمل ايه؟؟

لازم يستشير طبيب لأن التفاصيل بتفرق ... نوع السرطان وسن المصابين ودرجة القرابة ...

ساعات بيكون في إجراءات نقدر نعملها لتقليل الخطورة او الكشف المبكر

وفي أحيان كتيرة جدا بيكون المرض مش من الأنواع التي تورث من جيل لجيل

يتبع إن شاء الله ....